Met die kwas tussen sy tande vasgeknyp, praat, lag en skilder hy tegelykertyd. Die kleurvolle prentjies is sy drome, sy vryheid en die enkele aktiwiteit waaraan hy al sy tyd sou wou spandeer.

Die sewentienjarige Thatofatso Segapo, ‘n leerling by Meerhofskool, skilder die laaste drie jaar met sy mond en sy kunswerke het ‘n A+ op die onlangse Hartbeespoort Kunstefees verower.
Thatofatso is ook besig met vyf waterverf skilderye wat binnekort aan die mond-en-voet-skildervereniging voorgelê vir moontlike insluiting by hul werk.

“Dis die lekkerste ding om te doen. Ek sal verskriklik graag eendag net wil skilder, dis my droom,” vertel Thatofatso terwyl hy behendig die kwas in die water doop en verf meng voor hy aan een van sy kleurvolle kunswerke begin werk.

Thatofatso het ‘n breinbesering tydens geboorte opgedoen en is as ‘n spastiese kwadrupleeg geklassifiseer. Hy kan nie sy arms gebruik nie en loop moeilik.

Sy kunsaanleg het hy toevallig ontdek toe hy tydens ‘n kunsklas probeer skilder het. “Ek het ‘n prentjie geteken en skielik besef ek het ‘n talent,” vertel hy met glinsterende oë. “En ek hou van waterverf, die kleure lewe.”

En sy gunsteling onderwerpe? “Ek hou daarvan om ou stuff soos geboue en shacks te paint, en die natuur, en voëls... Alles wat vir my mooi is.”

Sy kunsonderwyseres, Amalita Smith, is verbaas dat hy waterverf as ‘n medium verkies. “Dit is beslis die moeilikste skilder medium en net ‘n handjievol voet-en-mond skilders gebruik dit. Thatofatso het ‘n natuurlike aanvoeling en ons is trots op hom,” sê sy.

Hy woon in die Meerhofskool se koshuis en gaan net elke tweede week huis toe na sy gesin in Rustenburg. “Hulle is bly ek skilder so goed en is trots op my. Ek het al ‘n paar skilderye verkoop, en dis lekker,” lag hy.

“Skilder is vir my lekker want dit laat die dag vinniger verbygaan. Ek raak soms moeg vir die dag...”
Sy ander groot begeerte is om vir Oprah Winfrey te ontmoet.